ਸਰਦ ਰੁੱਤ --
ਸਰਕੰਡਿਆਂ ਦੀ ਛੱਤ
ਟਿੱਪ ਟਿੱਪ ਟਿੱਪ
---
ਸਿਆਹ ਰਾਤ --
ਇੱਕ ਪਲ ਰੁਕਿਆ
ਪਿੱਪਲ ਉੱਤੇ ਚੰਨ
---
ਅਸਥ ਘਾਟ --
ਮੁੱਕਿਆ ਸਫਰ
ਵਹਿ ਰਹੀ ਨਦੀ ਅਜੇ ਵੀ
---
ਸ਼ਮਸ਼ਾਨ ਘਾਟ --
ਨੌਂ ਮਣ ਲੱਕੜਾਂ
ਇੱਕ ਚੰਗਿਆੜੀ
---
ਵੀਰਾਨ ਘਰ --
ਵਿਹੜੇ ਵਿਚ ਮੌਲ ਰਿਹਾ
ਖ਼ੁਰਮਾਨੀ ਦਾ ਰੁੱਖ
----
ਪਹੁ-ਫੁਟਾਲਾ
ਸਾਵੇ ਪੱਤਿਆਂ 'ਤੇ ਲਰਜ਼ੇ
ਕਤਰਾ ਕਤਰਾ ਸ਼ਬਨਮ
--
ਰੁਮਕਦੀ ਵਾ --
ਕੱਚੀ ਕੰਧ 'ਤੇ ਲਹਿਰਾਈ
ਬੋਗਨਵਿਲੀਆ ਦੀ ਟਹਿਣੀ
---
ਪੈਰਾਂ 'ਚ ਡਿੱਗੀ ਕਿਤਾਬ
ਦੁਇ ਹਥਾਂ ਨਾਲ ਚੁੱਕੀ
ਦੁਇ ਨੈਣਾਂ ਨੂੰ ਛੁਹਾਈ
--
ਨਦੀ ਸਮਾਈ
ਸਾਗਰ ਵਿਚ
ਲਹਿਰਾਂ ਦਾ ਨਾਦ
---
ਸਿਆਲੂ ਧੁੱਪ --
ਭੁਰਭੁਰੇ ਪੱਤਿਆਂ ਉੱਤੇ
ਬੁੜ੍ਹਕੇ ਖਿੱਦੋ ਖੇਹਨੂੰ
---
ਰੁੱਖ ਤੋਂ ਝੜਿਆ
ਪਰਛਾਵੇਂ ਤੇ ਡਿਗਿਆ
ਇੱਕ ਪੀਲਾ ਪੱਤਾ
---
ਹਵਾ ਦਾ ਬੁੱਲਾ --
ਗੁਲਮੋਹਰ 'ਚੋ ਫੁੱਲ ਕਿਰੇ
ਨਾਲੇ ਕਿਰੀਆਂ ਕਣੀਆਂ
---
ਸਤੰਬਰ ਗਿਆਰਾਂ --
ਗਰਾਉਂਡ ਜ਼ੀਰੋ ਉੱਤੇ ਡਿੱਗੀਆਂ
ਵਰਖਾ ਦੀਆਂ ਬੂੰਦਾਂ
----
ਆਥਣ ਵੇਲਾ--
ਕੁਮਲਾਏ ਫੁੱਲਾਂ ਵਿੱਚ
ਇੱਕ ਕੱਛੂਕੁੰਮਾ
---
ਸਾਉਣ ਦੀ ਝੜੀ --
ਇੱਕ ਟਹਿਣੀ ਤੋਂ ਦੂਜੀ ਟਹਿਣੀ
ਟਿੱਪ-ਟਿੱਪ ਬੂੰਦਾਂ
---
ਮੋਹਲੇਧਾਰ ਵਰਖਾ --
ਪਾਣੀ 'ਚ ਘੁਲੀ ਪਗਡੰਡੀ
ਐਪਰ ਤੁਰਦੀ ਜਾਵਾਂ
---
ਪੁਰਜ਼ੋਰ ਹਵਾ --
ਗੁਲਾਬ ਦੇ ਗੁੱਛੇ 'ਚ ਅਟਕਿਆ
ਸੂਹੀ ਚੁੰਨੀ ਦਾ ਲੜ
---
ਪੱਤਝੜ --
ਰੁੱਖ ਚੀਲ ਦਾ, ਅਜੇ ਵੀ
ਹਰਿਆ ਭਰਿਆ
---
ਸਾਵੇ ਬਿਰਖ ਹੇਠ
ਲੱਕੜਾਂ ਦਾ ਢੇਰ --
ਸਿਆਲ ਦੀ ਉਡੀਕ
---
ਬਲਦਾ ਸਿਵਾ --
ਅੱਗ ਦੇ ਭਾਂਬੜ 'ਚੋਂ
ਉਭਰਿਆ ਇੱਕ ਅਕਸ
---
ਆਖਰੀ ਪਤਝੜ --
ਮਿੱਟੀ ‘ਚ ਸਮਾਇਆ
ਸਾਵਾ ਪੱਤਾ
---
ਸਰਘੀ ਵੇਲਾ--
ਲਲਾਰੀ ਦੇ ਮਟਕੇ 'ਚੋਂ
ਡੁਲ੍ਹਿਆ ਸੰਧੂਰੀ ਰੰਗ
---
ਤੇਰੇ ਜਾਣ ਮਗਰੋਂ --
ਕਿਆਰੀ ਵਿਚ ਖਿੜਿਆ
ਇੱਕ ਕਿਰਮਚੀ ਗੁਲਾਬ
---
ਪੁਸਤਕਾਲਾ -
ਬੱਚੇ ਦੇ ਮੋਢੇ 'ਤੇ ਬਸਤਾ
ਸਿਰ ਉਪਰ ਸੂਰਜ
----
ਸਬਜ਼ ਰੁੱਖ
ਮੌਲੀ ਨਾਲ ਬਨ੍ਹੀਆਂ
ਲਾਲ ਥੈਲੀਆਂ
---
ਚੰਨ ਚਾਨਣੀ -
ਰੇਸ਼ਮੀ ਚਾਦਰ ਤੇ ਪਾਵਾਂ
ਤੇਰੇ ਨਾਉਂ ਦਾ ਫੁੱਲ
---
ਵਲੇਵੇਂਦਾਰ ਪਗਡੰਡੀ --
ਸੁੱਕੇ ਪੱਤਿਆਂ ਤੋਂ ਲੰਘੀ
ਲਾਹ ਕੇ ਚੱਪਲਾਂ
---
ਅਗਨ-ਕੁੰਡ
ਉੱਡ ਰਹੇ ਕਾਗ
ਨੀਵੇਂ ਨੀਵੇਂ
